今晚岩岩睇完陳慧嫻演唱會黎. 演唱會正正八點鐘開始, 一d都冇遲喎.
今次坐第二行正中, 位置睇野冇得頂. 連女大提琴師對Hush
Puppies既招牌都睇得好清楚. 但係聽音樂就好似近左d,  我估遠番五六行會好d,
stereophonic既感覺會多d.

新城周國峰做司儀, 成晚係度幫太平第一信用咭賣廣告, 真係冇佢收. 不過算啦,
人地出咁多錢贊助呢個concert, 由佢賣多幾次啦 ^_^

開始呢, 先由葉詠詩帶住香港管絃樂團玩幾首音樂.  佢地奏一闋巴西既音樂;
然後奏Leonard Bernstein既West Side Story; New York Broadway Medley.
玩足一個鐘頭, 休息完至到慧嫻出場.

慧嫻著住一套高叉半中式旗袍出黎, 頭髮束成個髻.....嘩~~~~ 好靚呀佢!
又高貴又有古典味. 有d似Audrey Hephurn係Breakfast at Tiffany*s既味度喎.
真係岩哂同香港管絃樂團同台演出啦!

今晚佢把聲沙左喎, 唔知係咪練歌練到咁呢佢?
一開始就唱『傻女』,『飄雪』果幾首經典歌,
然後............估都估唔到............. 佢唱 "Don*t Cry for me Argentina"!
仲唱得好好添播. 平心而論 (我好好好好中意慧嫻, 所以一d都唔得客觀),
佢係冇Madonna唱得咁好. 但人地係西人兼且係錄音室慢慢撚首歌出黎.
以慧嫻咁用第二語文唱, 又唱現場, 出到咁既水準而經好叻架啦.

唱完呢首就入去換衫. 換左件月白色長裙出黎. 都好靚呀!

呢個傻女真係傻, 開場時佢口快快講錯野喎. 嘻嘻. 佢話:
『得到呢個機會同葉詠詩同埋香港管絃樂團一齊演出,
我覺得好遺憾..........哎丫, 嘻嘻嘻, 死啦, 我係話榮幸呀!』 成場人都笑到死,
好好玩呀 ^_^

講完野又唱幾首人人都未聽過既新歌, 又有國語歌. 唔知係咪未聽慣呢,
都引唔起共鳴既. 拿, 歌我就唔識唱啦,
不過我都知慧嫻呢首新中文歌既難度係好高既. 曲中轉key轉 tempo幾次,
好蝦人唱架.

然後呢, 又唱幾首『慧嫻金曲』, 咁就散場 L 囉.
都冇我至中意既『千千闋歌』既, 好失望呀! 慧嫻由頭至尾出場都唔夠七十分鐘,
唔夠喉呀, 真係唔夠呀. 岩岩先至warm up就玩完, 唔制呀! 手都未拍紅!
就算慧嫻唱多一個鐘頭都唔嫌多啦, 何況咁少? 成個演唱會都好, 唯一,
又係最唔滿意既, 就係十點十五分就走人.....唉 :~~~ (唔係我一個人咁話呀,
散埸時好多人都一路行一路咁講呀佢地. 人人都唔夠皮呀!!!!!)

學友同葉詠詩+香港管絃樂團果次我都有睇. 兩次比較我都係中意今次多好多.
可能係熟悉慧嫻d歌啦. 兼且學友果次好似轉登玩高調咁,
d歌又古典又唔識又唔好聽. 真真失望. 其實學友都係10:15完, 但係都覺得好夠.
呢次就---好---好---好---唔---夠---皮---呀!

敏敏
min...@geocities.com
http://www.geocities.com/Colosseum/7419